Degmo Inanta Boorama
Ee Aloog dusheediyo
Agagaarka Saw iyo
Awdal xeebeheediyo
Abbase iyo Libaaxleey
Iyo Eelo iyo Udo
Qadaw oodihiisiyo
Meel adhigu daaqiyo
Tegen illimihiisiyo
Ilihii dhexdoodiyo
Idhankii Dilaadiyo
Afka Gaawe lagu dhalay
*
Waa ubad xalaaloo
Biyo aqal samaaniyo
Waalid aad u wacaniyo
Dhaqankii udgoonaa
Ka abuurmay weeyaan
*
Waa gabadh asluubiyo
Ixtiraamka guudiyo
Il-nugeyl haweeniyo
Anshaxiyo is wada dhawr
Ababkeedu uu yahay
*
Go’e inantu waa inan
Ubad weeyi hawl fudud
Waa gabadh ilkaha qoran
Axdigii ay qaadiyo
Waa naag amaanadu
Sanka oogadiisiyo
Kaga taallo meel adag
*
Gabadh aan iskuulkiyo
Aqalkiyo arddaagiyo
Hooyadeed agteediyo
Ka fogaan albaabkoon
Ibtiloonin weeyoo
Jacaylkeedu waa udub
Marka lagu abuuraa
*
Af soomaaligeediyo
Sheekadeedu waa edeb
Waa erayo googo’an
Naxariis ilkaha taal
Aaddo iyo huunniyo
Waa hadalo uurka ah
*
Waa dareen abyoonoo
Waa xidid arooroo
Abtirsiimadeediyo
Dhaqankeedu waa uud
*
Anfaceedu waa garaw
Iyo subag udgoon weyn
Agabkeedu waa gogol
Xariir aragga deeqdoo
Indhadaalis loo tolay
Aqal laba daryaala ah
Tuldohoo ummaagiyo
Alool-dhebi la soo xulay
*
Midabkeedu aaliyo
Ubixii galoolkiyo
Sida roob aroryiyo
Waa oogta waaberi
*
Waa gabadh adeec badan
Ehel weeyi reer jecel
Waa hooyo ubadkiyo
Odaygaba u foojigan
*
Go’e inantu waa inan
Waa naag udgoon jecel
Gabadh uunsi garab yaal
Gaari weeyi aqalkiyo
Aynigeeda loo bogo.
W/T: Bashir Sh. Omer Good (Goth)
Add comment
Comments